Dijaman saonari on, somal do dirayahon halak ari ulangtahunna, tarlumobi ma di angka naumposo, nang dakdanak. Manang na bohama tahe dibahen lao manghalashon ari hajajadi i. Ai tohodo, ringkot do i sude, asa boi mamereng iba tu pudi, manaili, nunga olat ni dia niulahon di hasiangan on, jala di ari hajajadi i pe tong do boi gabe tingki niba mangaranap tu jolo, aha nanaeng siulaon diari nanaeng ro.
Di huta naribur, songon di kota-kota besar, olo do dibaen perayaan ulang tahun perak ninna, ima molo nunga 25 taon, jala ulang tahun emas ninna molo 50 taon. Marmassam do anggo sara ni jolma lao mamestahon on, boi dohonon mamereng tu sibahenon ni tangan ni sasahalak do i. Molo attar siadongan do, olo do digokhon sude angka dongan sahutana, dongan sakarejo, dongan sapunguan/arisan, nang dongan sakantor. Alai adong do holan dijabu, holan di patupa na margoar sian manuk, dungi martangiang ma.
Songoni do nang disada keluarga. Nian anggo inanta on dang pola be diharingkothon angka sisongon on, mardomu nunga ulangtahun pa limapuluonomhon nama. Nunga matua daging, ai dang pola be sipestahonon i, pasuda-suda sibaenon, hape haporluan na asing tu angka parsikkola nang tu haporluan siganup ari godang dope. Ima anggo dirohani ni NanTarida saleleng on. Dang hea dirayahon ibana ianggo ari hatutubuna, jala olo do sipata lewat sambing dang diboto ibana ala angka ulaonna na tung mansai godang. Sahat rodi umurna limapuluh taon, iannakkon na na tolu i nunga karejo sude, nunga tammat sikkola, jala nunga boi mangalului ngoluna be.
Disada tikki, di na sopamotoan ni ibana, marrapot ma anakkonna na tolu on, dohot nioli tunggane dolina, amanTarida. Ia isi ni rapot ni halakon, ima laho mambaen pesta perayaan ni ulang taon ni natoras na boru, inongna. Ditahi nasida ma, aha na naeng sipatupaon nasida di inongna, jala ikkon na pas ma tu inongna nian. Ai akka anak na burju marnatua-tua do ango ianakkonna on, na ingot di di natorasna.
Didiok si Tarida, sihahaan i ma, “Boha molo horung ta tuhor,….”.
“Unang ma adong do horung ni inong, jala muse arga do i, na asing ma tapillit,..boha molo baju, ai huparate-atehon na piga bulan on, songon naso hea do ganti baju ni inong, jadi baju-baju ma ta tuhor” ninna si Padot, anakna sipaidua.
Ro siapudan, “ah…annon dang pas, hape naeng mambaen sada ‘kejutan’ do hita,”
Dungi didok amongna ma, ala dibereng songon na tabo pakkataion ni anakna natolui “Songonon ma i, rap mangan hita, ta baen ma partangiangan na met-met madok hata mauliate hita di Tuhanta ala dilean do ganjang ni umur di inongmu, dungi molo tung talean pe annon baju dohot horung na met-met manang akka dia na asing, disima dung sidung mangan tapasahat. Taingot-ingot ma, aha sipanganon lomo ni rohani inongmu, ima tapatupa. Annon molo dung lao ibana manang na tudia, taloppa ma dijabu, asa tung las rohana”
“Olo amang” ninna nasida, huhut las rohana ala satolop do hape amangna tu nasida laho mambaen sipalas roha ni inangna. Anggo sileanon i, nunga mardos roha nasida, bahan kebaya nama leanonna.
“Boha molo taloppa sop ulu ni dekke?…ai molo mangan hita, sai ulu ni dekke do di inong, jala hea do didok, holan uluna do solomanna,…ima taloppa tabo jala denggan, asa las rohani inong.” ninna siappudan mandok
“Ido tutu anaha,…ai mulai sian na sohot hami, sai didok do, uluna solomanna…” ninna amana mangalusi. Dos ma rohana, di parade ma na hombar tusi.
Dipahobas ma pangaloppaan, dipalas ma aek, dipature nasida bumbu, dilului ma ulu ni dekke tu pajak, jala massai las rohanasida mangulahonsa. Adong mandogol sabe, adong makkarejoi bawang. Las situtu do rohani amanTarida, ama nasida i, mamereng anakkonna, ala diboto do hape mambaen na tupa tu inongna.
Tutu ma dah, dapot ma ditikkina, dung martahi botari, nunga mulak nanTarida tu jabu, nunga loja ibana sian pargurendean pararikamis, alai sian naso panagaman ni rohana tor dibuat niloina amanTarida ma aek na tonggi na nigulaan si inumonna, jala nanTarida pe, longang ma rohana, songon na so hea. Nang songonipe tahe anak na siangkangan holan hundul ibana pittor kusut-kusut ma patna,, gabe songon na tamba ma longang nin rohana. Disukkun ibana ma “Aha namasa??”
Alai danga dong na mangalusi, dungi didok anakna siampudan ma “Inong, beta ma mangan nunga hu lompa hami, na tung mansai tabo situtu di inong”. Lam martamba-tamba ma longang ni rohana, sai dipikkir na marnipi ibana, alai dioloi do anakkonna i, ala nunga sai ditogihon.
Dibukka ma tutup ni sipanganon i, jala dibereng ma sipanganon ulu ni dekke i disi, sian uapna dohot sian rupana, nunga tung mansai hushus situtu. Rap mandok ma nasida “Selamat ulang tahun, inong, nion ma sipangangon soloman mi ” huhut ma di umma hurum ni inong na i
Dang jalo dialusi nai Tarida, alai manetek ma iluna, ro sian simalolongna.
Marsigoitan ma namartinodohon, rap dohot amana, jala marsusip-husip ma na sida, mandok, sonang ni rohani inong na manjalo sipanganon i, sampe tangis tarilu. Mekkel ma nasida na opat, mekkel suping, las roha na sida ala dibereng, tangis inong na i ala pambahenan na sida di ari ulang tahun i, molo dihata sisaonari dipikkir nasida ma ro ilu ni inanai ala ni na terharu.
Songoni do nang Amani Tarida, dibereng ma suasana i, nunga hohom be didok ibana ma ” Buat ma attong, asa las rohani anak mi, ai nunga sadari nasida paturehon i, diboto do soloman ni rohami”.
Nang pe sai ro dope ilu ni Nai Tarida, alai didok ibana ma hatana ninna ma ” Dihamu anakku, dohot ho among ni dakdanak, nga tung mansai las rohakku ala di ingot hamu dope hape ari hatutubukku, tohomai mandok mauliate do au, nang pe tu hamu gellenghu, na huhaholongi. Holan on ma si ingoton muna..” Sip ibana satokkin, jala dipanotnoti ibana akka anakkonna na tolu i, huhut idaon songon na las roha na sida.
“Mulai sian na tubu au, sahat ro di marhamulian au tu ho bapak ni si Tarida, dang hea huallang uluni gulamo, uluni manuk, gair-gair ni manuk, ai huboto do soadong siallangon sian i. Ai holan holi-holi do disi, jadi dang adong dai ni i. Ise ma halak na olo marhasoloman tu uluni gulamo? ndang adong. Alai ingot hamuma, huallang jala hudok pe lomo rohakku mida i ala soadong do hamu mangallang i, asa dihamu do akka tonga-tongana, akka sibukna, asa unang marisuang sipanganon i, holan na manarihon hamuna do. Ai anggo diau, umporlu do hamu sude, molo nunga butong hamu mangan rap mekkel, nunga sonang rohakku, agia pe holan ulu ni gulamo i di au. Ai di ingot hamu do mulai sian na menek hamu? adong do na olo hamu na opat mangallang ulu ni gulamo?? dang adong, sude do margulut tu sibukna, ujung na di au ma uluna. Nang pe songoni, mauliate do dohonon ala di ingot hamu dope hape sadari on …..” huhut ma sai manetek iluna.
Holan dibege songoni, mangandung ma anak na natolu i sude, di haol ma inong na i, dang tardok nasida be manang aha. Dang hape ditanda nasida ise inong na i.
—o O o —
Sering kita melupakan hal yang sepele dari orang-orang yang kita cintai, sering kita salah mengerti akan apa yang mereka perbuat ketika kita bersama-sama dengan mereka. Sebenarnya kita tidak tau, bahwa kadang mereka berbuat sesuatu hanyalah untuk menyenangkan kita, dan karena kebesaran jiwa dan rasa cinta kasih kepada kita, sering mereka melupakan kesenangan mereka, demi kita. Kadang kita cuma bisa melihat apa yang dilihat oleh mata kita sendiri, tanpa memikirkan apa yang dilihat dan dirasakan oleh mata hati kita. Kita bisa seperti ini hanyalah karena kasih dari orang – orang yang mencintai kita, karena pengorbanan mereka dan karena cinta mereka kepada kita. Demi cintanya seorang ibu kepada anak-anaknya, si ibu sanggup tidak membeli baju baru hanya untuk memenuhi kebutuhan si anak.
Hanya dengan kekuatan cintalah si ibu bisa bangun pagi-pagi benar untuk menyiapkan sarapan pagi bagi kita dan segala kebutuhan kita. Tanpa rasa malu dan bau busuk seorang ibu sanggup menjadi pemulung dan mengumpulkan sisa-sia makanan dari rumah makan untuk dijadikan pakan ternak, dijual untuk memenuhi kebutuhan kita.
HAnya karena cinta, seorang ibu tahan berlama-lama bekerja di sawah dan diterpa hujan dan matahari. Hanya karena cinta, seorang ibu mau berdiri selama berjam-jam di bus kota menjajakan penganan untuk mencari sekeping logam, buat beli makanan anak-anaknya. Itulah keperkasaan dari tangan seorang perempuan yang bisa mengubah dunia.
Ungkapkanlah cinta dengan rasa peduli pada orang-orang yang kita kasihi di sekeliling kita.
Suhutan on di Pasahat tu Inang Simatuangku ( Op.Rudy Br Hutabarat) Ultah ke 81
Tidak ada komentar:
Posting Komentar